Qəzzada baş verənlər min il əvvəl səlibçilərin işğalı zamanı və İkinci Dünya Müharibəsində yaşananlar qədər vəhşilikdir.
APA-nın Türkiyə müxbirinin verdiyi xəbərə görə, bu barədə Türkiyə Prezidenti Rəcəb Tayyib Ərdoğan Nazirlər Kabinetinin iclasından sonra xalqa müraciətində bildirib.
O qeyd edib ki, Türkiyə Qəzzada axan qanı dayandırmaq üçün səfərbər olduğu halda, Qərb ölkələri vicdansızlıq nümayiş etdirir.
Ərdoğan, həmçinin onu da əlavə edib ki, Türkiyə indiyədək Qəzzaya 800 tona qədər yardım göndərib: “Türküstandan Əfqanıstana, Balkanlardan Afrikaya kimi harda göz yaşı tökən varsa, Türkiyənin şəfqət əli oradadır”.
1967-ci il sərhədlərində paytaxtı Şərqi Qüds olan Fələstin dövlətinin yaradılması artıq qaçılmazdır. Bununla bağlı əlimizdən gələni edəcəyik. Fələstin məsələsi ədalətli siyasi həll yoluna qovuşmasa regionumuzda daimi sülh və sabitliyin təminatı mümkün deyil. Ümid edirik ki, tez bir zamanda girovların mübadiləsi ilə bağlı müsbət nəticəni görəcəyik”, - deyə Ərdoğan bildirib.
Qeyd edək ki, R.T.Ərdoğan Əlcəzairdə səfərdədir.
